Gipalig-on pa sa lokal nga pangagamhanan sa Liloy ubos sa liderato ni Mayor Roberto Lim Uy Jr. ang kampanya batok sa cybercrime pinaagi sa pag-host sa Courtesy and Coordination Meeting alang sa pag-aktiba sa Zamboanga del Norte Provincial Cyber Response Team (PERT).
Ipailalom ang PERT sa Anti-Cybercrime Group – Regional Anti-Cybercrime Unit 9 (ACG–RACU-9) aron mapalig-on ang kahandaan sa probinsya batok sa mga hulga nga may kalabotan sa cybercrime.
Nanguna sa delegasyon sa ACG–RACU-9 si PLTCOL Michael D. Batoctoy, Officer-in-Charge sa RACU-9, uban sa ubang personahe sa unit nga mitambong sa maong panagtigom.
Samtang, tumong niini nga mapanalipdan ang komunidad batok sa mga hulga sama sa online scams, hacking, ug uban pang cyber-related nga kalapasan.
Gilauman nga pinaagi sa pag-aktiba sa Provincial Cyber Response Team, mas mapaspas ug mas organisado ang pagresponde sa mga insidente sa cybercrime sa tibuok Zamboanga del Norte.(IKEN B. GULLEM)
Source: Municipality of Liloy