Mipahigayon ang Provincial Government of Zamboanga del Norte (PGZN), ubos sa liderato ni Darel Dexter T. Uy, og tulo ka adlaw nga writeshop gikan Pebrero 18 hangtod 20, 2026 sa Zamboanga del Norte Convention and Exhibition Center alang sa pag-andam sa Provincial Commodity Investment Plan (PCIP) 2026–2028.
Atol sa writeshop, nagtapok ang Provincial Core Planning Team nga gilangkuban sa Provincial Planning and Development Office, Office of the Provincial Agriculturist, Provincial Disaster Risk Reduction and Management Office, ug Provincial Environment and Management Office, uban ang teknikal nga suporta gikan sa Regional Project Coordination Office IX.
Gisusi usab sa mga partisipante ang produksyon, kahimtang sa merkado, risgo sa klima, ug mga kakulangan sa value chain sa mga prayoridad nga tanom aron matino ang angay nga mga programa ug proyekto. Tumong sa plano nga mapataas ang produksyon, mapalambo ang post-harvest system, mapalig-on ang merkado, ug mapalambo ang kalig-on sa sektor batok sa epekto sa kalamidad.
Ang PCIP 2026–2028 magsilbing giya sa pamuhunan sa gobyerno ug pribadong sektor aron madugangan ang kita sa mga mag-uuma, mapalig-on ang seguridad sa pagkaon, ug masuportahan ang malungtarong kalamboan sa agrikultura sa Zamboanga del Norte.(IKEN B. GULLEM)
Source: Zamboanga del Norte Provincial News Network