Nakabenepisyo ang kinatibuk-ang 60 ka pasyente sa padayong pagpatuman sa libreng “Kuyog Ta” Medical Check-up Program nga gipangulohan ni Gov. Darel Uy, diin 56 kanila ang nacheck-up samtang upat (4) ang malampusong naoperahan.
Ang maong programa nagtutok sa mga pasyenteng adunay sakit sa kasingkasing, baga, vascular cases, ug kadtong nagpailalom sa dialysis, ilabi na ang mga walay igong pinansyal nga kapasidad aron matambalan ang ilang mga sakit.
Miduyog usab sa kalihokan ang mga visiting specialists gikan sa Cebu City, lakip si Dr. Michael Burdador, usa ka vascular ug cardiac surgeon, ug si Dr. Paolo Martin Serios, usa ka vascular ug thoracic surgeon, nga mitabang sa pag-assess ug pag-opera sa pipila ka mga pasyente.
Usa sa mga nakabenepisyo mao ang 21-anyos nga estudyante nga si Sherwin Jay F. Sangal gikan sa lungsod sa Sindangan nga adunay sakit sa kasingkasing.
Samtang ang 46-anyos nga si Myrna N. Malmis gikan sa Barangay Madalag, Jose Dalman, nagpadayon sa iyang ika-pitong dialysis human sa iyang pagpakonsulta niadtong Enero 13, 2026, pinaagi gihapon sa suporta sa programa.
Kini nga inisyatiba kabahin sa padayong paningkamot sa administrasyon ni Gov. Uy aron mapalig-on ang serbisyo sa panglawas sa probinsya ug mahatagan og dekalidad ug espesyal nga pag-atiman ang mga residente sa Zamboanga del Norte.(IKEN B. GULLEM)
Source: Zamboanga del Norte Provincial News Network