Gipahigayon sa probinsyal nga pangagamhanan sa Zamboanga del Norte ang Year-End Appreciation Program kaniadtong Disyembre 19 sa Zamboanga del Norte Convention and Sports Center, isip pagpasidungog ug pag-ila sa kakugi sa mga kawani ug empleyado sa lalawigan.
Ang kalihukan nagtumong sa pagpasalamat sa ilang padayon nga serbisyo ug sa pagpalig-on sa panaghiusa sa sulod sa pangagamhanan.
Gipasiugda ni Vice Governor Julius C. Napigquit ang kahinungdanon sa kooperasyon ug teamwork alang sa epektibong pag-alagad sa katawhan. Samtang si Governor Darel Dexter T. Uy mipahayag sa iyang pasalamat, nga giila ang mga empleyado isip haligi sa kalampusan sa mga programa sa probinsya.
Mipaabot usab og mensahe sa suporta si 2nd District Congresswoman Irene G. Labadlabad, nga midayeg sa lig-on ug matinud-anon nga serbisyo publiko sa lalawigan ubos sa karon nga administrasyon.
Gitapos ang programa sa raffle draws, Christmas presentations gikan sa nagkadaiyang buhatan, ug dinner fellowship, nga nakahatag og kalipay ug nagpalig-on sa espiritu sa Pasko taliwala sa mga empleyado.(IKEN B. GULLEM)
Source: Zamboanga del Norte Provincial News/ Photo via Gov Dare Uy