Gipangunahan ni Provincial Agrarian Reform Program Officer (PARPO) II Daisy Dell Suan Digamon ang usa ka courtesy visit sa Registry of Deeds (ROD) sa Zamboanga del Norte, isip kabahin sa paningkamot sa Department of Agrarian Reform (DAR) nga mapalig-on ang koordinasyon ug institutional collaboration tali sa duha ka ahensya.
Atol sa bisita, nakigtagbo si Digamon kang ROD–Zamboanga del Norte Atty. Alvin G. Bontuyan, ROD–Dapitan City Atty. Rez Rein Janolina, ug ROD–Dipolog City Atty. Geralyn Tome Romarate. Gituki niini ang mga komon nga kabalaka sa pagdumala sa dokumento sa yuta, lakip ang pagpaayo sa mga proseso aron mas paspas ug episyente ang paghatod sa serbisyo publiko.
Sumala sa DAR, ang maong engagement nagtumong sa pag-streamline sa mga transaksyon nga may kalabotan sa land tenure ug agrarian reform cases, ilabi na sa rehistro sa mga titulo ug dokumento sa yuta nga sakop sa programa sa gobyerno.
Gipahayag usab sa mga opisyal sa ROD ang ilang suporta sa mga inisyatiba sa DAR, ilabi na sa pagpaayo sa koordinasyon tali sa mga opisina aron mas mapalambo ang transparency, accountability, ug kahusayan sa serbisyo alang sa katawhan sa Zamboanga del Norte.(IKEN B. GULLEM)
Source: DAR ZAMBONORTE