Padayon ang paghan-ay sa province-wide referral system sa Zamboanga del Norte aron mas mapaspasan ang pagbalhin sa mga pasyente ngadto sa angay nga pasilidad panglawas ug masiguro nga makadawat sila sa tukmang serbisyo medikal sa hustong panahon.
Kabahin sa maong paningkamot ang Referral Coordination Meeting nga nagtigom sa mga Chiefs of Hospitals, Municipal Health Officers, Doctors to the Barrios, Chief Nurses, Triage Officers, Disaster Risk Reduction and Management Officers (DRRMOs), Public Health Nurses, ug uban pang health officials gikan sa nagkalain-laing district hospitals ug local health offices sa lalawigan.
Atol sa panagtigom, gisusi sa mga partisipante ang kasamtangang referral system ug gihisgutan ang mga lakang aron mapalig-on ang koordinasyon tali sa mga pampubliko ug pribadong pasilidad panglawas ug sa ubang kaabag nga mga institusyon.
Sumala sa mga health officials, ang episyenteng referral system makatabang sa pagpaspas sa pagbalhin sa mga pasyente ngadto sa hustong health facility, ilabina sa mga kaso nga nagkinahanglan og espesyal nga pag-atiman.
Padayon pa usab ang paghan-ay sa sistema, busa gihangyo ang publiko ug mga stakeholders nga magpadayon sa pagsuporta ug pagsabot samtang gipauswag ang mga proseso.
Gilauman nga mapahimutang ang province-wide referral system sulod niining tuiga ug mahimong hingpit nga operasyonal sa umaabot nga tuig.
Gipasiugda sa mga partisipante nga ang tumong sa maong sistema dili lamang ang pagpasayon sa referral sa mga pasyente, kondili ang pagsiguro nga matag pasyente makadawat sa hustong serbisyo medikal sa hustong dapit ug sa tukmang higayon.(IKEN B. GULLEM)
Source: Zamboanga del Norte Provincial News Network