Natapos na sa Department of Agrarian Reform (DAR) Zamboanga del Norte ang serye sa mga town hall meeting alang sa mga Agrarian Reform Communities sa Barangay Nonoyan ug Barangay Kauswagan sa Baliguian, isip kabahin sa pagpalig-on sa land tenure security ug pagpanalipod sa katungod sa mga lehitimong Agrarian Reform Beneficiaries (ARBs).
Gipangunahan ang katapusang pulong-pulong ni Provincial Agrarian Reform Program Officer (PARPO) II Daisy Dell Suan Digamon pinaagi sa Municipal Agrarian Reform Office sa Baliguian ubos sa pagpangulo ni Municipal Agrarian Reform Program Officer (MARPO) Engr. Noel B. Credo.
Atol sa panagtigom, nakigpulong ang DAR sa Kauswagan Sloping Agri and Land Tech Association (KASALTA), nga girepresentahan ni Chairman Leonsito Baclion, ug sa mga ARBs sa 351.6107-ka ektaryang Parcel 2098 aron hisgutan ang mga lakang sa pagpanalipod sa yutang agraryo ug pagsiguro nga kini mapadayon sa mga lehitimong nag-uma.
Gipasabot sa DAR nga ang mga yutang gibiyaan ug wala na mapahimusli sulod sa kapin 30 ka tuig mahimong bawi-on pinaagi sa Certificate of Disqualification ug igahatag ngadto sa mga aktuwal nga mag-uuma nga dugay nang nag-atiman ug nag-uma niini, subay sa mga polisiya sa Comprehensive Agrarian Reform Program.
Aron mapaspasan usab ang proseso sa paghatag sa mga titulo sa yuta, nagpahigayon ang DAR og on-site survey inspection aron masiguro ang tukmang pagproseso sa mga dokumento ug paghatag sa yuta ngadto sa mga kwalipikadong benepisyaryo.(IKEN B. GULLEM)
Source: DAR Zamboanga del Norte Province