Gipundok ni Congw. Irene G. Labadlabad ang mga punong barangay sa ikaduhang distrito sa Zamboanga del Norte ug ang Department of Public Works and Highways (DPWH) aron mapalambo ang koordinasyon ug matubag ang mga isyu nga nakaapekto sa nagpadayong mga proyekto sa imprastraktura.
Atol sa panagtigom, gipasaka sa mga barangay officials ang ilang mga kabalak-an ug mga sugyot bahin sa implementasyon sa mga proyekto, nga gitubag sa mga representante sa DPWH nga gipangulohan ni District Engineer Norman Carpio. Gihisgutan usab ang mga angay’ng lakang aron masiguro nga hapsay ang pagpatuman sa mga proyekto subay sa mga sumbanan sa gobyerno.
Matud ni Congw. Labadlabad, importante ang padayon nga koordinasyon tali sa DPWH ug sa mga lokal nga opisyal aron masulbad dayon ang mga hagit sa implementasyon ug mapadali ang paghuman sa mga proyekto nga mapuslanon sa mga komunidad.
Pinaagi sa maong inisyatiba, gipasidunggan usab ang panagtambayayong tali sa nasyonal ug lokal nga panggamhanan isip kabahin sa paghatag og kalidad ug tukmang-panahong imprastraktura alang sa mga lungsoranon sa Ikaduhang Distrito sa Zamboanga del Norte.(IKEN B. GULLEM)
Source: Irene “Ate Ai” Labadlabad