Nakadawat ug tulo ka dungogang pasidungog ang Probinsyal nga Pangagamhanan sa Zamboanga del Norte atol sa 2025 Regional Year-End Universal Health Care Awards nga gipahigayon sa Garden Orchid Hotel, Zamboanga City.
Ang maong pasidungog gidawat ni Board Member Venus Uy alang sa probinsya kauban si Acting Provincial Health Officer Dr. Benson Panaguiton, nga ni representar kang Gobernador Darel Dexter Uy.
Giparangalan ang probinsya isip Champion sa Universal Health Care Governance Award, nga nag-ila sa epektibong pangagamhanan sa probinsya sa pagpasiugda sa universal health coverage ug pagpalapad sa akses sa kalidad nga serbisyo medikal alang sa tanang lumulupyo.
Dugang pa, nadawat usab sa probinsiya ang LGU Achiever’s Award on Family Planning, ug Health Promotion Award–Gold tungod sa kadasig ug kalampusan niini sa pagpauswag sa family planning, ug wellness programs sa tanang komunidad.
Gipasiugdahan sa Department of Health (DOH) ang seremonya sa pasidungog nga mipunting sa dakong kalambuan sa rehiyon bahin sa pangagamhanan sa kahimsog, family planning, ug pagpasiugda sa maayong panglawas, samtang gisilibrar usab ang positibong epekto niini sa mga komunidad sa tibuok rehiyon.(IKEN GULLEM)