Malampusong natapos ang ZPRAA 2026 o ang Zamboanga Peninsula Regional Athletic Association diin gipakita sa nagkadaiyang contingents ang ilang talento, disiplina, ug panaghiusa sa nagkalain-laing sporting events sa rehiyon.
Mitumaw isip usa sa labing lig-on nga delegasyon ang ZANORTE Division (Zamboanga del Norte, Dipolog City ug Dapitan City), nga nakatigom og 125 ka bulawan, 119 ka pilak, ug 118 ka bronze, nga adunay kinatibuk-ang 362 ka medalya diin ang pinakataas nga total medal count sa tibuok kompetisyon, bisan og ikaduha lamang sa overall ranking.
Samtang, napadayon sa Zamboanga City Division ang ilang dominasyon pinaagi sa ikatulong sunod-sunod nga kampeonato. Sa laing bahin, mipahimutang sa ikatulong pwesto ang Zamboanga del Sur Division nga nagpakita gihapon og lig-on ug konsistenteng performance. Nakahatag usab og maayong representasyon ang ubang contingents lakip ang Pagadian City, Zamboanga Sibugay, Isabela City, ug Sulu.
Sumala sa mga tig-organisa, ang ZPRAA 2026 dili lamang kompetisyon sa medalya kondili usa ka simbolo sa panaghiusa, kalinaw, ug sportsmanship sa Zamboanga Peninsula, diin napamatud-an sa ZANORTE nga ang kalampusan makab-ot pinaagi sa kusog sa panaghiusa ug kolektibong paningkamot.(IKEN B. GULLEM)
Source: DepEd Tayo- Youth formation Region IX Zampen SSLG