Andam na ang probinsya sa Zamboanga del Norte alang sa engrandeng pagsaulog sa ika-74 nga Founding Anniversary pinaagi sa “SAULOG sa Bag-ong ZaNorte 2026” nga pagahimoon gikan Hunyo 1 hangtod 6, 2026.
Magdala ang selebrasyon og nagkadaiyang kalihokan lakip na ang cultural showcases, sports competitions, concerts, tourism fair, beauty pageants ug community activities nga magpasiugda sa kultura ug panaghiusa sa katawhan sa probinsya.
Ubos sa tema nga “SAULOG 2026: Kuyog Ta sa Kahiusahan, Kalinaw ug Kalamboan sa Bag-ong ZaNorte,” gilauman nga mas mapalig-on pa ang panag-uban sa mga lungsod ug komunidad sa tibuok probinsya.
Lakip sa mga dagkong kalihokan ang State of the Province Address, street dancing competition, agri-tourism fair, Saulog Queen 2026, job fair, concerts ug lain-laing sports tournaments.
Giawhag usab sa provincial government ang mga residente ug turista nga moapil sa kasaulogan ug masinati ang adunahang kultura ug maabiabihong pagdawat sa mga taga-Zamboanga del Norte.(IKEN B. GULLEM)
Source: Zamboanga del Norte Provincial News Network