Gihugtan sa Department of Agrarian Reform (DAR) Zamboanga del Norte ang proseso sa pagtino ug pag-validate sa mga yutang sakop sa agrarian reform pinaagi sa Field Investigation nga gihimo sa Salug ug Tampilisan.
Kabahin ang maong lakang sa Land Acquisition and Distribution (LAD) Documentation Process aron masiguro ang tukmang datos ug legal nga kahimtang sa mga yutang target maapil sa programa sa agrarian reform karong 2026.
Sa pagpanguna ni Provincial Agrarian Reform Program Officer II Daisy Dell Suan Digamon, gisusi sa DAR team ang mga detalye sa yuta sama sa klase ug gidaghanon sa tanom, utlanan, accessibility, survey monuments, ug distansya ngadto sa merkado.
Sa walo ka landholding nga target susihon, tulo niini, duha sa Salug ug usa sa Tampilisan ang malampusong naimbestigahan sa team nga gipangulohan ni Municipal Agrarian Reform Program Officer Peter Paul R. Cajocon ug DARPO personnel.
Gamit usab ang field investigation aron masuta ang aktuwal nga okupasyon sa yuta, mapamatud-an ang kahusto sa land records, ug mahibal-an ang basehan sa land valuation ug kompensasyon sa landowners subay sa giya sa Comprehensive Agrarian Reform Program (CARP).
Giorient usab sa DAR ang mga giilang Agrarian Reform Beneficiaries (ARBs) bahin sa ilang katungod ug obligasyon isip mga benepisyaryo sa yuta ilawom sa programa.(IKEN B. GULLEM)
Source: DAR Zamboanga del Norte Province