Gitutokan sa nagkahiusang komite sa Sangguniang Panlungsod sa Dapitan ang mga proposal nga may kalabotan sa market relocation ug paggamit sa city-owned facilities atol sa joint committee hearing niadtong Mayo 19 sa SP Conference Room sa New Government Center.
Gihisgutan sa Committee on Rules and Revision of Ordinances, Committee on Ways and Means, Committee on Economic Enterprise, ug Committee on Public Utilities ang proposed ordinances nga nagtakda sa regulasyon ug bayranan sa paggamit sa LED Wall, sound system, Lawn Tennis Court, ug Pickleball Court nga gipanag-iya sa siyudad.
Apil usab sa hearing ang urgent nga hangyo alang sa paghimo og ordinansa sa pagbalhin sa Temporary Public Market nga kasamtangang nahimutang sa DAMPA, Barangay Banonong ngadto sa bakanteng lugar tali sa Children’s Park ug Bagting Covered Court sa Barangay Bagting.
Base sa referral, tumong sa proposed relocation nga mapalambo ang accessibility ug negosyo sa mga micro, small, and medium enterprises (MSMEs) pinaagi sa mas estratehikong pwesto sa merkado.
Samtang, padayon pang tun-an ug deliberahon sa mga komite ang mga proposal sa dili pa kini dal-on alang sa pinal nga rekomendasyon ngadto sa konseho.(IKEN B. GULLEM)
Source: Sangguniang Panlungsod of Dapitan