Gipalig-on pa ang papel sa kabatan-onan sa maayong panggamhanan atol sa unang adlaw sa YIGG (Youth in Good Governance) Youth Camp 2026 pinaagi sa usa ka Youth Symposium nga gitambongan sa mga SK chairpersons ug youth leaders gikan sa nagkalain-laing lungsod sa ikaduhang distrito sa Zamboanga del Norte.
Nagtapok ang mga delegado gikan sa Sindangan, Siayan, Dipolog City, Katipunan, Roxas, Manukan, ug Jose Dalman aron moapil sa empowerment sessions ug mga diskusyon nga nagtumong sa pagpalambo sa ilang kapasidad isip mga lider sa komunidad.
Usa sa mga highlights sa kalihokan mao ang paghatag og mensahe sa mga opisyal gikan sa National Youth Commission (NYC) lakip si Undersecretary Jeff Ortega, Chairman ug CEO sa NYC; Hon. Carol Julianne Dalipe, SK National President; ug Raymond Domingo, Regional Director sa NYC IX. Gipasiugda nila ang importansya sa aktibong partisipasyon sa kabatan-onan sa leadership ug nation-building.
Ubos sa tema nga “Kabatan-onan: Tingog sa Kauswagan, Kauban sa Maayong Panggamhanan,” gilauman nga mas mapalig-on pa ang tingog ug partisipasyon sa mga batan-on sa pagduso sa kalamboan ug positibong kausaban sa ilang tagsa-tagsang komunidad.(IKEN B. GULLEM)
Source: Ate Ai Labadlabad