Gatusan ka mga bakanteng trabaho ang ablihan alang sa mga job seekers atol sa Job Fair karong Hunyo 4 sa Zamboanga del Norte Convention and Exhibition Center isip kabahin sa selebrasyon sa Saulog 2026 sa probinsya sa Zamboanga del Norte.
Gipasiugdahan ang kalihokan sa Provincial Government of Zamboanga del Norte ubos sa administrasyon ni Governor Darel Dexter Uy pinaagi sa Public Employment Service Office (PESO) ug sa pakigtambayayong sa Department of Labor and Employment (DOLE) aron mahatagan og dugang oportunidad sa trabaho ang mga residente sa probinsya.
Lakip sa mga posisyon nga gitanyag mao ang para sa mga accountant, engineers, nurses, IT professionals, welders, electricians, mechanics, drivers, sales personnel, cooks, cashiers, delivery riders, ug uban pang trabahong gikan sa nagkalain-laing industriya ug sektor.
Maghatag usab og libreng serbisyo ug customer assistance ang mga ahensya sa gobyerno sama sa SSS, Pag-IBIG Fund, PhilHealth, DTI, TESDA, DICT, ug PNP aron mapadali ang proseso sa aplikasyon ug uban pang panginahanglanon sa mga aplikante.
Giawhag sa mga organizers ang tanang interesadong mangitag trabaho nga magparehistro daan online ug magdala sa ilang resume ug importante nga dokumento sa adlaw sa Job Fair. Gilauman nga makatabang ang maong kalihokan sa paghatag og dugang panginabuhian ilabina sa mga kabatan-onan ug bag-ong graduates sa probinsya.(IKEN B. GULLEM)
Source: Zamboanga del Norte Provincial News Network