Padayon karon nga gipahigayon sa Philippine Statistics Authority (PSA) ang 2026 Community-Based Monitoring System (CBMS) Validation aron ma-update ug mapamatud-an ang rekord sa mga benepisyaryo sa social protection programs nga wala maapil sa 2024 CBMS database.
Gihimo ang maong validation ubos sa direktiba sa Department of Economy, Planning, and Development (DEPDev) ug naglangkob sa mga benepisyaryo sa nagkalain-laing programa sa Department of Social Welfare and Development (DSWD) sama sa Pantawid Pamilyang Pilipino Program (4Ps), Social Pension alang sa indigent senior citizens, ug Walang Gutom Program (WGP).
Sumala sa PSA, importante ang maong kalihokan aron masiguro nga kompleto ug tukma ang datos sa mga benepisyaryo nga nagkinahanglan sa serbisyo ug ayuda gikan sa gobyerno. Pinaagi niini, malikayan usab ang kakulangan sa records nga mahimong makaapekto sa padayon nga pagdawat sa benepisyo.
Giawhag sa ahensya ang tanang naapektuhang benepisyaryo nga makigtambayayong sa mga field personnel nga moadto sa ilang komunidad alang sa validation process. Gipasabot sa PSA nga ang aktibong partisipasyon sa publiko dakong tabang aron mas mapadayon ang episyente nga paghatag sa mga serbisyo sa gobyerno.(IKEN B. GULLEM)
Source: PSA Zamboanga del Norte