Dobleng benepisyo ang gidala sa “Tara, Basa!” Tutoring Program sa Dapitan City, diin ang mga batan-on dili lang motabang sa pagpauswag sa pagbasa sa kabataan kundi makabaton usab og kita ug kasinatian sa trabaho.
Gipahigayon ang usa ka semana nga capability building gikan Abril 28 hangtod Mayo 2, 2026 ubos sa Department of Social Welfare and Development (DSWD), uban sa Jose Rizal Memorial State University, Department of Education, ug lokal nga kagamhanan.
Ang training nag-andam sa mga student tutors ug Youth Development Workers (YDWs) nga ipadala sa nagkalain-laing eskwelahan aron motudlo ug motabang sa mga batang adunay kakulang sa pagbasa.
Gibahin ang mga sesyon sa duha ka lugar—ang YDWs sa New Government Center Amphitheater ug ang student tutors sa JRMSU campus—aron mas matutokan ang ilang tagsa-tagsa ka papel.
Atol sa training, aktibong miapil ang mga partisipante sa praktikal nga mga leksyon ug presentasyon, nga nagpalig-on sa ilang abilidad sa pagtudlo ug pakigtrabaho sa komunidad.
Gipasabot sa Department of Social Welfare and Development nga ang programa usa ka “earn-and-learn” initiative nga nagtumong sa paghatag og oportunidad sa kabatan-onan samtang ginatubag ang literacy needs sa mga estudyante.
Gilauman nga pinaagi niini, dili lang ang mga bata ang makabenepisyo, kundi usab ang mga batan-ong tutors nga makadawat og dugang kita ug mahalagang kasinatian nga magamit sa ilang umaabot nga karera.(IKEN B. GULLEM)
Source: City Government of Dapitan