Sayong pagplano ang gihimo sa Dapitan City aron mas mapahimuslan ang potensyal sa turismo ug ekonomiya sa umaabot nga Kinabayo Festival karong Hulyo.
Gipangulohan ni City Administrator Danilo S. Areños Jr. ang usa ka coordination meeting sa New Government Center uban sa mga opisina sa syudad ug partner agencies, isip preparasyon sa month-long nga kalihokan.
Gipasiugda sa city administration nga ang sayong pag-andam dili lang para sa hapsay nga selebrasyon, kundi para usab sa pagdani og mas daghang bisita, negosyo, ug oportunidad para sa lokal nga mga negosyante.
Sumala ni Areños, ang paglatid daan sa mga plano ug proyekto makatabang sa pagpalig-on sa organisasyon sa pista ug paglikay sa kalit nga problema sa implementasyon.
Samtang, ang Kinabayo Festival mahimong mas kusgan nga instrumento sa pagpalambo sa turismo, pagpukaw sa lokal nga negosyo, ug pagpasigarbo sa kultura sa Dapitan City.(IKEN B. GULLEM)
Source: City Government of Dapitan