Wala na ka ipsot sa kamot sa mga tinugyanan sa balaod homan masikop ang usa ka wanted person nga nag atubang sa kasong pagpang lugos atol sa gipatuman nga hiniusang operasyon alas 6:30 ang takna sa gabii niadtong Marso 10, 2026, didto sa Purok 4, Barangay Poblacion, Libungan, Cotabato.
Ang maong dinakpan nga wanted person naila nga si alyas “Indo” 53 anyos,ulitawo, lalaki, construction worker, ug residente sa nahisgutang lugar.
Ang pagkasikop sa suspek gihimo sa pinaagi sa Tracker Team sa Sindangan Municipal Police Station uban sa koordinasyon sa Tracker Team sa Libungan Municipal Police Station, PRO12 (lead unit), ug sa 1st District PIU-CPPO pinasikad sa Warrant of Arrest tungod sa paglapas sa Section 5(b) sa Republic Act 7610 (Special Protection of Children Against Abuse, Exploitation and Discrimination Act) nga gi-isyu ni Hon. Mundlyn Geonzon Misal-Martin, Presiding Judge, RTC Branch 05, 9th Judicial Region, Zamboanga del Norte, nga gipetsahan Hulyo 23, 2025, nga adunay piyansa nga P60,000.00 alang sa temporaryong kagawasan.
Ang dinakpan gidala sa Libungan District Hospital alang sa pisikal ug medikal nga eksaminasyon, ug karon anaa na kini sa kustodiya sa Libungan MPS samtang naghulat sa pag-isyu sa Commitment Order gikan sa Korte.(MEDALYN U. BORJA)
Source: ZNPPO