Gidawat sa buhatan ni Gov. Darel Dexter Uy ang mga representante gikan sa opisina ni Sen. Kiko Pangilinan aron hisgutan ang mga programa ug proyekto nga makapadali sa pagpalambo sa sektor sa agrikultura sa probinsya.
Gilangkuban kini nila Noriel Cabanela, Tres Largo ug Marlon Micua, nga mibisita sa probinsya alang sa validation meetings ug inspeksyon sa nagkalain-laing project sites nga gilauman makadawat og pondo gikan sa nasyonal nga gobyerno. Apil sa gi-review nga proyekto ang gisugyot nga agricultural port sa probinsya, nga gitumong aron mapalig-on ang pagbaligya ug transportasyon sa mga produktong agrikultural.
Sa maong panagtigum, gihisgutan usab ang implementasyon sa Sagip Saka Act sa lokal nga lebel, nga nagtumong sa paghatag mas dako nga merkado ug oportunidad sa mga mag-uuma pinaagi sa direktang pagpalit sa ilang mga produkto sa gobyerno ug pribadong sektor.
Gisgutan usab ang pagsuporta sa mga programa sa nasyonal nga gobyerno sama sa Benteng Bigas ng Pangulo nga nagtinguha sa paghatag mas barato nga bugas ngadto sa publiko.
Sumala sa kapangulohan sa probinsya, ang maong panagtagbo usa ka importante nga lakang aron mapalig-on ang kooperasyon tali sa nasyonal ug lokal nga gobyerno, ilabi na sa pagdala og mga programa ug pondo nga direkta makatabang sa mga mag-uuma ug residente sa Zamboanga del Norte.(IKEN B. GULLEM)
Source: Gov Darel Uy