Malampuson ug walay nahitabong insidente ang pagpahigayon sa Station of the Cross (Via Crucis) 2026 sa lungsod sa Liloy, Zamboanga del Norte human sa hugot nga preparasyon sa lokal nga Disaster Risk Reduction and Management Office (LDRRMO).
Sa wala pa ang kalihokan, nagpahigayon og Operational Period Briefing ang LDRRMO aron masiguro ang klarong plano, papel, ug deployment sa matag sakop sa Incident Management Team, LDRRM Council, ug uban pang partner agencies.
Gipaandar usab ang Incident Command System ubos sa Unified Command sumala sa direktiba ni Mayor Roberto Lim Uy Jr., nga nagpalig-on sa koordinasyon ug liderato sa tanang ahensya nga nalambigit sa kalihokan.
Gipahimutang sa mga otoridad ang igo nga pwersa sa seguridad, lakip na ang mga police personnel, traffic marshals, ug medical teams sa nagkalain-laing lugar aron masiguro ang kahapsay sa dagan sa prusisyon, kontrol sa kadaghanon sa mga deboto, ug dali nga pagresponde sa bisan unsang emerhensya.
Tungod sa maayong pagplano ug koordinasyon, natuman ang Via Crucis nga malinawon, organisado, ug walay naitalang insidente.(IKEN B. GULLEM)
Source: LDRRMO LILOY