Nagpahayag og dakong kasubo ang City Government of Dapitan human sa pagkamatay sa usa ka Job Order personnel sa City Engineering Office – Planning Division nga nalambigit sa usa ka trahedya sa Mt. Lab, Barangay Sto. Niño, niadtong Biyernes, Abril 3, 2026.
Sumala sa opisyal nga report sa Dapitan City Police Station ubos sa liderato ni PLTCOL Eva Joy E. Capurcos, alas 8:19 sa buntag dihang nadawat ang tawag gikan sa Emergency 911 kalabot sa pagkahulog sa bangin sa maong lugar.
Sa inisyal nga imbestigasyon, duha ka indibidwal ang misaka sa Mt. Lab sayo sa buntag. Apan samtang nanaog sa usa ka hait ug pig-ot nga bahin sa agianan, ang usa kanila nakabsan og balanse ug nahulog gikan sa gibanabanang 200 metros nga kahabogon sa bangin, hinungdan sa iyang kamatayon.
Mi-responde dayon ang mga kapulisan uban sa City Disaster Risk Reduction and Management Office (CDRRMO) aron kumpirmahon ang insidente ug maglunsad og retrieval operations. Tungod sa kalisod sa terrain ug sa kahait sa pangpang, nagkinahanglan kini og maampingong koordinasyon ug dugang oras.
Nakatabang sa retrieval ang Bureau of Fire Protection, mga opisyal sa barangay, ug mga boluntaryo sa Barangay Sto. Niño hangtod nga malampusong narekober ang lawas sa biktima.
Gipasalig usab sa lokal nga gobyerno nga hatagan og suporta ang pamilya sa biktima ug ang kauban niini sa insidente, lakip na ang psychosocial services sama sa counseling ug psychological first aid aron matabangan sila sa pag-atubang sa trauma.
Samtang nagpadayon ang imbestigasyon, gideklarar nga sirado sa walay takdang panahon ang trail padulong sa Mt. Lab tungod sa delikadong kahimtang sa lugar ug kusog nga hangin.(IKEN B. GULLEM)
Source: City Government of Dapitan