SINDANGAN, ZAMBOANGA DEL NORTE — Usa ka pamilya sa Barangay Fatima ang mipadayag og dakong pasalamat human makabenepisyo sa libreng operasyon nga gipaluyohan sa probinsyal nga kagamhanan.
Ang pasyente nga si Evelyn Azero naaksidente sa motorsiklo ug nabalian sa tiil, nga nanginahanglan dayong operasyon. Sumala sa iyang pamilya, dako unta kaayo ang gasto, apan pinaagi sa programa sa probinsya, wala sila’y nabayran sa operasyon, tambal, ug pagpabilin sa ospital.
Gihimo ang operasyon sa Zamboanga del Norte Medical Center ug malampuson kini, hinungdan nga nakagawas na ang pasyente human sa duha ka semana ug padayon sa pagpaayo sa ilang balay.
Matod sa pamilya, dako kaayong tabang ang maong serbisyo ilabi na sa mga adunay limitadong kita, ug naglaum silang magpadayon ang ingon ani nga programa aron mas daghan pang residente ang matabangan.(JENIFFER JR. DELICA)
Source: Zamboanga del Norte Provincial News Network