Samad sa bahin sa tiyan ug li-og ang nahiaguman sa usa ka nars homan kini gipusil sa usa ka “riding in tandem” pasado alas 10:30 ang takna sa kagabhion niadtong Mayo 7, 2026, atubangan sa usa ka establisemento nga komersyo sa Barangay Turno,Dipolog.
Ang maong biktima nailhan nga usa ka 48 anyos nga babayeng nars nga nadestino sa usa ka lokal nga ospital, kinsa padulong na unta sa trabaho sa dihang kalit siyang giduol sa duha ka wala mailhing lalaking suspek nga nagmotorsiklo, hinungdan nga ang mga awtoridad nagpahigayon dayon og hugot nga imbestigasyon.
Base sa inisyal nga imbestigasyon, ang backrider giingong maoy mipusil sa biktima sa makadaghang higayon, nga naigo sa ubos nga bahin sa tiyan ug liog sa wala pa mikalagiw padulong sa wala mahibal-i nga direksyon.
Tungod niini, dali nga niresponde ang kapulisan sa lugar sulod sa duha ka minuto human sa pagreport sa insidente ug dayun gidala ang biktima sa duol nga ospital alang sa dinaliang pagtambal ug anaa na sa luwas nga kahimtang.
Gilayon nga naglunsad ang mga awtoridad og hot pursuit operation ug nakig-alayon sa mga hingtungdang law enforcement units para sa dragnet operations ug crime scene processing homan gisusi usab sa mga imbestigador ang mga CCTV footage sa lugar aron makatabang sa pag-ila sa mga suspek.
Sa inisyal nga pagsusi nagpakita nga ang insidente posibleng usa ka kaso sa Frustrated Murder, tungod kay gitarget ug tinuyo ang pag-atake sa biktima.
Sa pagkakaron,padayon pa ang imbestigasyon aron mahibal-an ang motibo sa pagpamusil ug mailhan ang tanang indibidwal nga nalambigit.
Samtang , giawhag usab sa mga personahe sa Dipolog City Police Station ang bisan kinsa nga adunay impormasyon may kalabotan sa insidente nga makig-alayon dayon sa mga awtoridad aron mapadali ang imbestigasyon.(MEDALYN U. BORJA)
Source: ZNPPO