Gigamit sa mga ahensya sa gobyerno ang skimboarding clinic isip paagi sa pagdasig sa kabatan-onan sa eco-tourism ug pagpanalipod sa kinaiyahan atol sa usa ka adlaw nga kalihokan nga gipahigayon sa Ocean Grey Beach Resort sa Barangay Talinga.
Ang programa nga “Skills Development, Livelihood, and Coastal Tourism Promotion with Coastal Clean-up Drive” gipangulohan sa Department of Tourism Region IX uban sa suporta sa lokal nga kagamhanan ug uban pang ahensya.
Gipaila sa maong kalihokan ang skimboarding isip alternatibong sports activity nga makahatag usab og oportunidad sa turismo ug panginabuhian sa mga komunidad nga duol sa baybayon.
Lakip usab sa gihimo ang environmental conservation lecture nga gipangunahan ni Ronel C. Pagasihan sa Department of Environment and Natural Resources aron mapalambo ang kahibalo sa mga partisipante bahin sa pag-atiman sa coastal ug marine ecosystems.
Naghimo usab og coastal clean-up drive ang mga partisipante gikan sa DENR, DOT ug lokal nga kagamhanan aron mapakita ang panaghiusa sa pagmintinar sa kalimpyo sa kabaybayonan.
Kabahin usab sa programa ang drug awareness campaign nga gipahigayon sa Philippine Drug Enforcement Agency isip suporta sa kampanya alang sa luwas ug responsableng komunidad.
Sumala sa organizers, tumong sa kalihokan nga mapalig-on ang partisipasyon sa kabatan-onan sa turismo, environmental protection ug positibong community engagement pinaagi sa sports ug coastal activities.(IKEN B. GULLEM)
Source: DENR Zamboanga Peninsula