Tingkagol prisohan homan masikop ang usa ka driver nga tigpayuhot sa ilegal na drugas atol sa gihimo nga buy bust operation sa mg personahe sa Katipunan Municipal Police Station (MDET) (lead unit) uban sa 5th SOU PNP-MG Mabuhay SBC,didto sa Purok 4, Brgy. Tuburan, Katipunan, Zamboanga del Norte, mga alas 5:25 ang takna sa kahapunon, Enero 18,2026.
Naila ang dinakpan nga suspek nga usa ka 38 anyos nga lalaki, minyo, drayber, ug residente sa Brgy. New Tambo, Katipunan, Zamboanga del Norte, naila nga bag-ong Street-Level Individual (SLI) kinsa nakumpiskahan sa kapulisan ug mutimbang sa 2.5 gramos sa gidudahang shabu nga adunay gibanabanang kantidad nga mobalor sa Php 17,000.00.
Apil sa nakumpiska atol sa operasyon mao ang usa ka gamay nga heat-sealed transparent plastic sachet nga adunay sulod nga gituohang shabu (buy-bust evidence), tulo ka gagmay nga heat-sealed transparent plastic sachet nga adunay sulod nga gituohang shabu (nakuha gikan sa posisyon sa suspek), usa ka Php 500.00 nga marked money, usa ka walay sulod nga pakete sa sigarilyo nga Winston nga gigamit nga sudlanan, unom ka Php 100.00 nga kwarta, ug usa ka orange lighter.
Ang nadakpang suspek gidala sa RHU Katipunan alang sa medical examination ug karon anaa na sa kustodiya sa Katipunan MPS alang sa hustong disposisyon ug pagpasaka sa tukmang kaso, samtang ang mga nakumpiskang droga isumite sa Zamboanga del Norte Provincial Forensic Unit (ZNPFU) alang sa chemical examination.(MEDALYN U.BORJA)
Source: ZNPPO