Nakabsan sa kinabuhi sa iyang hinulmang kinabuhi ang usa sa mga driver nga nalambigit sa nahitabong panagbangga tali sa usa ka Bao-bao,motorsiklo, ug SUV didto sa National Highway, Barangay Galas, ning dakbayan sa Dipolog mga 1:30 ang takna sa hapon niadtong Marso 2, 2026.
Ang insidente gitaho sa mga awtoridad mga alas 1:35 sa hapon pinaagi sa usa ka tawag sa Emergency Operations Center ning syudad.
Sa inisyal nga imbestigasyon, nagbutyag nga ang tulo ka mga sakyanan nagbiyahe sa parehas nga direksyon diin ang mga nalambigit niini nga mga sakyanan mao ang usa ka Honda XRM nga motorsiklo, usa ka Piaggio nga tricycle nga nailhan nga “Bao-Bao,” ug usa ka Isuzu Mu-X sport utility vehicle (SUV) .
Nasayran nga ang motorsiklo gimanehoan sa usa ka 73 anyos nga lalaki, minyo, ug residente sa Barangay Galas, Dipolog,samtang ang driver sa tricycle nailhan nga usa ka 52 anyos nga lalaki, minyo, ug residente sa susamang Barangay ug ang laing driver usab nga nalambigit nga nagmaneho sa usa ka SUV nailhang usa ka 42 anyos nga lalaki, minyo, ug residente sa Barangay Santa Filomena,ning syudad sa Dipolog.
Gikataho nga kusog ang pagpadagan sa drayber sa motorsiklo gikan sa usa ka residential area padulong sa national highway diin pag-abot sa mismong highway, giingong nawad-an og kontrol sa iyang motorsiklo ang drayber nga miresulta sa pagkabangga niini sa traysikol ug sa sport utility vehicle.
Matod pa ang drayber sa motorsiklo nakaangkon og grabeng kadaot sa ulo ug gidala dayon sa ospital apan, gideklarar sa attending physician niini nga dead on arrival, ug ang laing duha ka mga drayber luwas ra sa maong disgrasya.
Ang tanang mga sakyanan nga nalambigit gidala ngadto sa Dipolog City Police Station alang sa hustong dokumentasyon ug disposisyon ug alang usab sa padayong imbestigasyon sa kaso.(MEDALYN U. BORJA)
Source: ZNPPO