Pinaka-unang Kasalan Sa Probinsya himuon sa administrasyon ni Governor Rosalina ‘Nanay Nene’ Jalosjos, pinaagi sa buhatan sa PSWDO sa pagpangulo ni Dr. Pepe Mante, karong Pebrero 14, ning tuig, sa Zamboanga del Norte Cultural and Sports Center, Estaka, Dipolog City.
Ang Kasalan Sa Probinsya mao ang halad-tabang Ni Nanay Nene sa Pamilya sa adlaw sa gugma, para niadtong dugay nang nag-ipon ug aduna nay mga anak gikan sa tulo (3) ka tuig pataas o katong mga mansibado.
Matud ni Dr. Mante, nga makabenipisyo ang mga kaslunon sa libreng kasal pinaagi sa huwes, CENOMAR, Wedding Cake, Wedding Ring, 5 kilos bugas, Pre Marriage Counseling ug libreng pagkaon para sa bag-ong mga gikasal.
Dugang ni Dr. Mante nga limitado lamang ang Kasalan Sa Probinsya, para sa unang 100 ka parisan nga aplikante.
Ang mahimong mga maninay ug maninoy o mga sponsors mao si Governor Nanay Nene ug mga department heads sa probinsya.
Dugang paghatag bulok sa maong okasyon, adunay award nga madawat ang pinakanindot nga bridal gown ug ang pinaka-gulang nga edad sa mga magpakasal.
Gidasig usab ni Dr. Mante, ang matag LGU sa tibuok ZaNorte nga mohimo usab sa susamang kalihukan nga mao ang kasalan ng bayan.
Gihimo ang Kasalan Sa Probinsya tungod kay nakita nga daghan ang mga pasyente sa ZNMC ug ubang mga tambalanan sa ZaNorte nga dili maka-avail sa Philhealth kay walay mga marriage contract nga maoy usa sa mga rekisitos nga pangitaon sa Philippine Health Insurance.
Busa gidapit ang tanan nga wala pa makasal sulod sa tulo ka tuig ug pataas nga panag-ipon nga mobisita lang sa buhatan sa PSWDO sa first floor sa Kapitolyo, pakigkita ni Dr. Mante alang sa aplikasyon ug dugang impormasyon.
(Source: Provincial Information Center Zanorte Facebook page)