Isip kabahin sa selebrasyon sa Nutrition Month, gipahigayon sa Provincial Government of Zamboanga del Norte ang unang Inter-Office Cook-Off Contest niadtong Hulyo 29 sa Plaza Capitol aron mapasiugda ang husto nga nutrisyon pinaagi sa pag-andam og masustansya ug abot-kayang pagkaon.
Gipangulohan sa Office of the Provincial Health Officer ubos ni OIC-Provincial Health Officer Dr. Benson Panaguiton ang maong kompetisyon diin gikinahanglan nga ang mga partisipante mogamit og mga utanon gikan sa KADIWA booths isip pangunang sangkap sa ilang mga putahe.
Aron ipakita nga dili kinahanglan og dako nga gasto sa pag-andam og himsog nga pagkaon, gidid-an ang paggamit og food enhancers ug gitakda nga dili molapas sa ₱500 ang kantidad sa mga rekado sa matag grupo. Gihatagan usab ang mga partisipante og usa ka oras ug 30 minutos aron mahuman ang ilang mga luto.
Migawas nga kampyon ang Office of the Provincial Veterinarian (PROVET), samtang nakakuha sa ikaduhang puwesto ang Office of the Provincial Legal Officer ug ikatulo ang Office of the Provincial Disaster Risk Reduction and Management Office (PDRRMO).
Tungod niini, gipalig-on sa kagamhanang probinsyal ang kampanya alang sa himsog nga panginabuhi ug husto nga nutrisyon, samtang gipasiugda usab ang panaghiusa ug pagkamamugnaon sa mga empleyado sa nagkalain-laing opisina.(IKEN B. GULLEM)
Source: Zamboanga del Norte Provincial News Network