Malampusong gihost sa City Government of Dapitan ang La Partida Historical Conference niadtong Hulyo 29 sa Audio-Visual Room sa Jose Rizal Memorial State University (JRMSU) Library isip kabahin sa paghinumdom sa ika-130 anibersaryo sa makasaysayang La Partida o pagbiya ni Dr. Jose Rizal gikan sa siyudad.
Gitumong ang maong komperensya sa pagpalawom sa pagsabot sa kinabuhi ug mga ideyal sa nasudnong bayani, ilabina sa iyang upat ka tuig nga pagpuyo sa Dapitan ug sa iyang malungtarong kontribusyon sa nasud.
Naghatag og keynote lectures sila Vice Mayor Gabriel M. Cad ug Knights of Rizal Supreme Commander Dr. Emmanuel F. Calairo, KGCR, diin ilang gipaambit ang kahinungdanon sa panahon ni Rizal sa Dapitan ug sa iyang panulondon nga nagpadayon hangtod karon.
Sa mensahe ni Mayor Evelyn “Belen” T. Uy nga gibasa ni City Councilor Atty. Jeneth N. Baje, gipasiugda nga bisan mibiya si Rizal sa Dapitan, nagpabilin ang iyang kabilin sa pag-alagad, edukasyon, ug pagkamakabayan sa kasingkasing sa mga Dapitanon.
Gitambongan ang kalihokan sa mga opisyal sa lokal ug probinsyal nga panggamhanan, mga representante sa JRMSU ug DepEd, mga miyembro sa Knights of Rizal, mga magtutudlo, tigdukiduki, ug mga estudyante. Gisundan kini og open forum aron mapalawom pa ang pagsabot sa kahinungdanon sa La Partida ug sa kasaysayan ni Rizal sa Dapitan.(IKEN B. GULLEM)
Source: Dapitan City Government