Gipangandaman na sa City Government of Dipolog, ang umalabot nga dagkong kalihokan, diin malamposong gipahigayon ang usa ka panagtigum didto sa City Mayor’s Office, Conference Room, niadtong nakalabay’ng adlaw, Agosto 19, 2025 nga nagsugod sa may kapin kon kulang ala 1:30 ang takna sa hapon.
Ang nasangpit nga meeting gipangunahan ni City Tourism Officer, Ms. Cecil Bilog, duyog sa nagkalain-laing mga hepe ug representante gikan sa mga buhatan ning dakbayan sa Dipolog, uban sa presensiya nila ni City Mayor Roberto Y. Uy ug konsehal Harrison “Sho” Young.
Tumong sa pagpahigayon sa maong meeting aron sa pagtuki sa gikinahanglang mga dugang pagpangandam alang sa pagpahigayon sa “Mindanao Tourism Exposition” (MTEX) nga ipahigayon dinhi sa Dipolog, ilawom sa pagpasiugda sa Department of Tourism, karong umaabot Oktubre 17 hangtud sa 19, ning tuiga.
Lakip usab sa gituki atol sa maong meeting, mao ang mga pagpangandam alang sa pagpahigayon usab sa “Dipolog Marathon” nga pagahimoon sa Oktubre 18 ug 19, maingon man ang“Dahunog sa Dipolog (Beat and Dance Parade-Elementary Level ug Parade Band Competition-Secondary Level) nga ipahigayon sa Oktubre 6, 2025, ug sa uban pang mga kalihokan nga gi-andam subay sa kasaulogan sa “20th Dahunog sa Dipolog” niiningtuiga.
Sigun sa nasayran, nga tinguha karon ni City Mayor Roberto Y. Uy nga mahimong masadya ug mabolokon ang mga kalihokan nga ipahigayon dinhi sa dakbayan, tungod kay kini ang gihimo alang sa tanang mga katawhan.
Sumala pa, nga dinha unya sa pagpahigayon sa MTEX, kini nga dakbayan ang paga-bisitahan sa tanang mga Rehiyon dinhi sa Nasud, aron tagsa-tagsang mohimo sa pagpromoter sa ilang mga dapit, sulod sa Upat ka Adlaw, nga gi-ubanan sa mga nagkalain-lain Aktibidades, isipt tipik niini nga kalihokan.
Sa pagtak-op sa maong meeting, malamposong nahatagan og kasulbaran ang mga nakitang kakulangon sa mga pagpangandam nga gihimo, dugang sa mga nakab-ot nga mga bulawanong ideya gikan sa mga partisipantes, aron sa pagseguro sa kalamposan sa pagpahigayon sa mga nahisgotang dagkong kalihokan sa unahan dinhi sa Dipolog.(Julius Esmade)
Source: DIPOLOG CITY GOVERNMENT