Mipa-abot og ayuda ngadto sa mga katawhan nga apektado sa paglunop, nunot sa nahitabong baha sa pipila ka mga dapit sa dakbayan sa Dipolog kaniadtong buntag sayo sa Agosto 19, 2025, tungod matud pa sa nasinatian nga Tropical Depression “Huaning”.
Wala gilayon naglanagan ang pangagamhanang lokal sa Dipolog, gipahigayon dayon ang hinanaling pagpanghatag og ayuda ngadto sa mga apektadong indibidwal didto sa nasangpit nga barangay nianang pagkahapon sa susamang adlaw, Agosto 19, ning tuiga, ug kini didto gitunol partikularmente ang Barangay Minaog.
Nasayrn nga ang maong kalihokan, gitambongan usab nila ni OIC-City Administrator, Atty. Valerie Hope Jauculan-Flores, kinsa mi-representar ni City Mayor Roberto Y. Uy, Acting City Legal Officer, Atty. Goldie Love P. Gonzales, uban sa presensiya ni Provincial Legal Officer, Atty. Edwin Prince I. Gonzales.
Ang pagpang-apod-apod sa mga hinabang ang gidumala sa mga personahe gikan sa City Social Welfare and Development Office, ilawom sa pagdumala ni City Social Welfare Officer, Mr. Patrick S. Jalapadan, duyog sa City Disaster Risk Reduction Management Office, sa dakbayan, inabagan sa mga opisyales gikan sa Barangay Minaog, sa pagpanguna ni Barangay Kapitan Jonathan L. Pelegrino.
Matud pa, nga adunay 302 ka mga pamilya ang apektado nga mikabat sa 1, 547 ka mga indibidwal gikan sa Purok Nipa nga adunay (135 ka bubong), Purok Cacao (65 ka bubong), Purok Parpagayo (6 ka bubong), Purok Buli (23 ka bubong) ug sa Purok Naga mikabat ngadto sa (73 ka bubong).
Tungod sa maong mga hinabang nga nadawat sa nasangpit nga mga apektado sa milabay mga pagbaha, nagpasalamat og dako ang mga katawahan, sa gihimong paspas nga aksiyon, ilabina ang aktibong pagpanguna sa ilang Barangay Kapitan sa Minaog, nga abtik mipadangat niini, ngadto sa buhatan sa Mayor ning dakbayan sa Dipolog.(Julius Esmade)
Source: CITY GOVERNMENT OF DIPOLOG