Gipasiugdahan sa City Social Welfare and Development Office (CSWDO) pinaagi sa Early Childhood Care and Development (ECCD) Unit ang mga pagpangandam alang sa umaabot nga Day Care Teachers’ and Workers’ Week atol sa City-Wide Monthly Meeting nga gipahigayon niadtong Hunyo 3 sa OSCA Covered Court sa Barangay Sta. Isabel.
Gitambongan sa tanang 46 ka Child Development Teachers (CDTs) ug Child Development Workers (CDWs) gikan sa nagkalain-laing barangay sa dakbayan, uban sa ilang mga Cluster-In-Charges nga mitabang sa pagplano ug koordinasyon sa mga kalihokan.
Lakip sa mga gihisgutan atol sa tigom ang bag-ong mga pamaagi ug dokumento nga gamiton sa Supplemental Feeding Program aron mapalambo pa ang implementasyon niini sa mga Child Development Centers. Gipaila usab ang tulo ka bag-ong Child Development Teachers nga bag-o lang natudlo sa programa.
Gihatagan usab og pagtagad ang internal assessment sa mga ECCD Centers, lakip ang mga kinahanglanon alang sa sanitary permit ug health inspection aron masiguro ang kaluwasan ug kahapsay sa pagdumala sa mga pasilidad alang sa kabataan.
Matud sa ECCD Unit, ang maong regular nga tigom importante aron mapalig-on ang koordinasyon ug maandam ang mga magtutudlo ug workers sa paghatag og mas epektibo nga serbisyo alang sa kaayohan ug kalamboan sa mga kabataan sa Dipolog City.(IKEN B. GULLEM)
Source: Dipolog City Social Welfare and Development Office