Unom ka mga job seekers ang nakaangkon dayon og trabaho atol sa Saulog 2026 Job Fair, usa sa mga nag-unang kalihokan sa ika-74 nga Adlaw sa Kasumaran sa Zamboanga del Norte nga gipahigayon niadtong Hunyo 4 sa ZN Convention and Exhibition Center.
Dul-an sa 300 ka mga aplikante ang nitambong aron mangita og oportunidad sa trabaho gikan sa 17 ka mga employer nga nagtanyag og nagkalain-laing bakanteng posisyon alang sa lokal ug overseas employment. Ang maong kalihokan nahimong higayon alang sa mga nangitag trabaho nga direktang makapakigkita ug makapa-interbyu sa mga kompanya.
Pinaagi sa Public Employment Service Office (PESO), gipalig-on sa probinsyal nga pangagamhanan ang koneksyon tali sa mga employer ug mga aplikante aron mapadali ang proseso sa pagpangita og trabaho ug pagkuha og empleyo.
Sumala ni Governor Darel Dexter T. Uy, dili lamang mga proyekto ug imprastraktura ang sukdanan sa kalamboan kondili usab ang paghatag og trabaho ug panginabuhian sa katawhan. Busa, padayon nga gipasiugdahan sa iyang administrasyon ang mga programa nga makahatag og dugang oportunidad sa mga Zamboangueño del Norte.
Ang Job Fair 2026 nahimong resulta sa panagtambayayong sa probinsyal nga pangagamhanan, Department of Labor and Employment (DOLE), Department of Migrant Workers (DMW), ug uban pang mga ahensya aron mas mapalapad ang access sa trabaho ug panginabuhian sa probinsya.(IKEN B. GULLEM)
Source: Zamboanga del Norte Provincial News Network