Gipahigayon sa Dipolog City Police Station ang Ugnayan sa Paaralan/Kabataan Program sa San Antonio Elementary School, Sangkol, Dipolog City, aron mapalig-on ang panag-uban sa Philippine National Police (PNP) ug mga institusyong pang-edukasyon sa pagpanalipod sa kabatan-onan batok sa droga, abuso, ug kriminalidad.
Ang kalihokan gipangulohan sa CAD ug WCPD personnel sa Dipolog City Police Station ubos sa liderato ni PCPT Charlot M. Lapiz, WCPD/CAD Officer, uban sa aktibong suporta sa Local Government Unit sa Dipolog City. Kini gihimo sa suod nga koordinasyon kang Mrs. Lane L. Gargarita, School Principal I, ug sa tabang sa JRMSU Criminology Interns. Gihimong ang awareness lecture sa Grade 6 Classroom sa maong eskwelahan.
Gipunting sa programa ang pag-edukar sa mga tinun-an aron malikayan ang ilang pagkalambigit isip biktima sa abuso ug kriminalidad. Lakip usab sa gipasiugda ang papel sa kabatan-onan isip mga kauban sa PNP sa pakigbatok batok sa iligal nga droga, terorismo, ug uban pang hulga sa kalinaw ug kaluwasan sa publiko.
Pinaagi sa temang “Stand Tall, Stand Strong, Stand Drug-Free!” ug “Youth as Partners for Peace and Public Safety,” gidasig ang mga estudyante nga mahimong disiplinado, responsable, ug aktibong kabahin sa pagmintinar sa kalinaw ug kahapsay sa ilang komunidad.(IKEN B. GULLEM)
Source: Dipolog City Police Station, ZNPPO