Giadam na ang mga magtiayon sa umaabot nga Kasalang Bayan 2026 human malampusong gipahigayon sa Local Government Unit (LGU) sa Dakbayan sa Dapitan ang oryentasyon alang sa mga magtiayon nga moapil sa Kasalang Bayan, nga gipahigayon kaniadtong hapon sa Pebrero 9, 2026, sa Amphitheater sa Government Center.
Atol sa maong kalihokan, gipasaligan sa administrasyon sa siyudad ang mga partisipanteng magtiayon nga kompleto na ug andam na ang tanang preparasyon alang sa gipaabot nga mass wedding.
Gipangulohan ang kalihokan sa mga kawani gikan sa City Mayor’s Office, Sangguniang Panlungsod, City Registrar’s Office, ug sa Economic Enterprise Division. Ilang gipatin-aw ang mga responsibilidad sa matag magtiayon aron masiguro ang hapsay ug organisadong pagdagan sa seremonya.
Ang Kasalang Bayan 2026 ipahigayon sa Covered Court sa Jose Rizal Memorial State University (JRMSU) Main Campus, diin gilauman ang malinaw, malinawon, ug malipayon nga selebrasyon alang sa tanang magtiayon nga moapil.
Ilalom sa malinawon ug malawom nga pagpangulo ni Mayor Evelyn “Belen” T. Uy, padayon nga nagsilbi ang Kasalang Bayan isip usa ka hinungdanong programa sa dakbayan aron matabangan ang mga magtiayon sa paglegalisa sa ilang panaghiusa ug pagpalig-on sa pundasyon sa ilang pamilya.(IKEN B. GULLEM)
Source: City Government of Dapitan