Gidala sa ospital ang tulo ka tawo human sila masamdan sa usa ka vehicular accident nga nahitabo sa Brgy. Ramon Magsaysay, Salug, Zamboanga del Norte niadtong Hunyo 28, 2026.
Pag-abot sa mga responder sa Bureau of Fire Protection (BFP), ilang nasiguro una ang kaluwasan sa lugar ug ilang nakit-an ang tulo ka biktima nga adunay panimuot samtang giatiman sa mga residente daplin sa dalan. Sa inisyal nga assessment, ang usa ka biktima nakaangkon og daghang samad sa ulo, mga kamot ug mga bitiis, samtang ang ikaduha adunay samad sa wala nga siko ug ang ikatulo adunay samad sa duha ka tuhod.
Gihatagan dayon og first aid ang tanang biktima pinaagi sa paglimpyo ug pagtambal sa ilang mga samad gamit ang angay nga medical procedures. Gipadayon usab sa mga responder ang pagmonitor sa ilang kahimtang aron masiguro nga luwas sila sa wala pa ibiyahe.
Human sa inisyal nga pag-atiman, gidala ang tulo ka samaron sakay sa MDRRMO Rescue Vehicle ngadto sa Liloy Integrated Health District Hospital alang sa dugang nga medikal nga ebalwasyon ug hustong pagtambal.(JENIFFER JR. DELICA)
Source: Salug Bfp