Nahiusa ang mga representante gikan sa 50 ka barangay sa Dapitan City sa usa ka tree-growing activity nga gipahigayon sa Barangay Tamion aron suportahan ang kampanya sa dakbayan alang sa pagpanalipod sa kinaiyahan ug watershed areas.
Gipangunahan sa City Environment and Natural Resources Office (ENRO) ubos ni Dr. George T. Olario Jr. ang kalihokan diin natanom ang 100 ka semilya sa Lumbayao ug 100 ka semilya sa Bagasili, mga lumad nga kahoy nga makatabang sa paglig-on sa yuta ug pagpakunhod sa peligro sa pagdahili.
Matud sa ENRO, kabahin kini sa padayon nga programa sa lokal nga kagamhanan sa reforestation ug pagpreserbar sa mga lumadng matang sa kahoy nga importante sa ekosistema sa dakbayan.
Gilauman usab nga ang pagtanom sa maong mga kahoy makatampo sa pagpaayo sa kalidad sa hangin ug pagbatok sa mga epekto sa climate change samtang nagpalig-on sa natural nga depensa sa komunidad batok sa mga kalamidad.
Aron masiguro ang kalampusan sa programa, gitugyan sa mga partisipanteng barangay ang responsibilidad sa pag-atiman ug pagmonitor sa mga kahoy nga ilang natanom isip kabahin sa hiniusang paningkamot alang sa mas lunhaw nga Dapitan.(IKEN B. GULLEM)
Source: City Information Division -Dapitan