Atol sa paghinapos sa SAULOG 2026 ug ika-74 nga Anibersaryo sa Pagtukod sa Probinsiya sa Zamboanga del Norte, gidayeg ni Gobernador Darel Dexter T. Uy ang Philippine National Police (PNP) tungod sa ilang epektibong pagpatuman sa seguridad nga nakatabang sa malinawon ug organisadong dagan sa tibuok kasaulugan.
Gipasalamatan sa gobernador si Provincial Director PCOL Reydante E. Ariza, Dipolog City Chief of Police PLTCOL Khisna B. Asaali, ug ang tibuok pwersa sa kapulisan alang sa ilang dedikasyon sa pagsiguro sa kalinaw ug kahapsay sa tanang kalihokan nga gipahigayon ubos sa SAULOG 2026.
Matud ni Gov. Uy, ang kalampusan sa kasaulugan resulta sa hiniusang paningkamot sa katawhan ug sa mga law enforcement personnel nga walay undang nga nagbantay aron masiguro ang kaluwasan sa publiko.
Gipasiugda usab ni Gov. Uy nga ang malinawong pagdumala sa SAULOG 2026 nagpakita sa panaghiusa, disiplina, ug lig-on nga kooperasyon tali sa gobyerno, kapulisan, ug katawhan sa Zamboanga del Norte.
Agig pagpasidungog, gidayeg sa Provincial Government si PCOL Ariza, PLTCOL Asaali, ug ang tibuok PNP personnel alang sa ilang dakong kontribusyon sa usa ka luwas ug malampusong selebrasyon sa SAULOG 2026.(IKEN B. GULLEM)
Source: Zamboanga del Norte Provincial News Network