Nagpalig-on sa ilang pisikal nga kaandam ang mga bombero sa Labason Fire Station pinaagi sa usa ka Physical Fitness Activity nga gipahigayon ubos sa pagpanguna ni FINSP Joel S. Sabijon, Acting Municipal Fire Marshal, aron masiguro nga andam sila sa pag-atubang sa nagkalain-laing emerhensya ug operasyon sa komunidad.
Lakip sa mga kalihokan ang endurance run, hose carry, sit-ups ug push-ups nga gitumong sa pagpauswag sa kusog, kalig-on ug kahimsog sa mga personnel. Ang maong mga ehersisyo nagsundog usab sa mabug-at nga kahimtang nga kasagarang masinati panahon sa aktuwal nga rescue ug emergency response operations.
Samtang nagpalig-on sa pisikal nga kahimtang, gipadayon usab sa estasyon ang pag-atiman sa panglawas sa mga personnel pinaagi sa regular nga monthly blood sugar monitoring nga gihimo kabahin sa kampanya sa Bureau of Fire Protection batok sa mga sakit nga may kalabutan sa lifestyle.
Gipasabot sa Labason Fire Station nga ang maong programa nagtumong sa sayong pag-ila ug paglikay sa diabetes ug uban pang komplikasyon sa panglawas aron masiguro nga ang matag bombero magpabiling himsog, lig-on ug andam sa pagserbisyo sa katawhan sa tanang panahon.(JENIFFER JR. DELICA)
Source: BFP R9 Labason Fire Station