Nagpadayon gihapon ang operasyon sa improvised tramline o “sky cable” sa Sitio Lakaron, Barangay Buenavista, Sergio Osmeña, Zamboanga del Norte sukad kini natukod niadtong 2018, ug karon nagsilbing importante nga lifeline sa mga residente ug mag-uuma sa lugar.
Gitukod ang maong cable transport system aron masulbad ang kalisod sa pagbiyahe ug pagdala sa mga produkto sa agrikultura tabok sa kabukiran ug lisod nga dalan, diin mas sayon na karon madala ang saging, mais, utanon ug uban pang ani sa laing bahin sa bukid sa kantidad nga ₱15 matag sako.
Bisan nagbitay ibabaw sa mga bangag ug kabukiran, ang tramline ginama sa steel cables ug metal nga plataporma nga lig-on nga nagsilbing adlaw-adlaw nga paagi sa transportasyon, ilabi na kon ting-ulan nga mahimong lapok ug halos dili maagian ang mga dalan.
Gitan-aw usab kini karon isip simbolo sa pagkamaligon ug pagka-madiskarte sa komunidad, samtang naglaum ang mga residente nga mapauswag pa kini ug mailhan sa mga otoridad isip posible usab nga tourist attraction tungod sa talagsaong kasinatian ug nindot nga talan-awon sa kabukiran.(JENIFFER JR. DELICA)
Source: Zamboanga del Norte Provincial News Network