Gipangunahan ni Cong. Labadlabad ang pagduso sa pag-ilis sa Quezon Bridge sa Dipolog City, nga mitultol sa commitment sa Department of Public Works and Highways (DPWH) nga ilakip ang pondo niini sa 2027 national budget.
Sa miting uban ni DPWH Secretary Vince Dizon, Planning Service Undersecretary Nicasio A. Conti, ug Assistant Secretary Michelle Mae Villanueva Vivo, klarong gipasiugda ang kahimtang ug importansya sa tulay isip kritikal nga koneksyon sa siyudad.
Gipresentar sa diskusyon nga ang Quezon Bridge karon sirado tungod sa kahuyang sa estruktura, nga nagpasabot og seryosong risgo sa kaluwasan sa publiko ug hinungdan sa kalangan sa transportasyon. Giila usab nga ang tulay usa ka pinakapaspas nga agianan padulong sa airport, mga negosyo, ug kasikbit nga komunidad.
Tungod sa maong presentasyon, midiretso ang DPWH sa pag-ila sa proyekto isip prayoridad ug misaad nga ipasulod kini sa 2027 budget. Lakip sa gihisgutan ang pagsugod sa preparatoryong mga lakang sama sa engineering design ug teknikal nga dokumentasyon aron maandam ang proyekto sa implementasyon.
Gitan-aw ang maong lakang isip konkretong aksyon aron masulbad ang dugay nang isyu sa tulay, nga adunay direktang epekto sa kaluwasan, mobility, ug ekonomiya sa Dipolog City ug sa tibuok Zamboanga del Norte.(IKEN B. GULLEM)
Source: Irene “Ate Ai” Labadlabad