Gipahugtan sa Philippine Statistics Authority (PSA) Zamboanga del Norte ang ilang kapasidad sa pagkolekta ug pagtuki sa presyo sa mga batakang palaliton pinaagi sa Second Level Training para sa Retail Price Survey (RPS) of Selected Commodities nga gipahigayon niadtong Mayo 11 hangtod 13, 2026 sa Mini Conference Room, A4M Building, Miputak, Dipolog City.
Miapil sa maong training ang tulo ka hired Statistical Researchers, nga gitutokan sa husto nga pamaagi sa pagkuha ug pagrekord sa presyo sa mga kasagarang gipalit nga produkto sa merkado.
Si Statistical Specialist II Angelica A. Guirgio, Provincial Focal Person, maoy resource person sa maong kalihukan nga nagtudlo sa standardized procedures aron masiguro ang tukmang data collection ug kalidad sa estadistika.
Ang Retail Price Survey usa ka buluhaton nga ginahimo matag bulan sa PSA aron makolekta ang datos sa presyo sa mga selected commodities. Kini nga mga impormasyon maoy gigamit sa pagkuwenta sa Consumer Price Index (CPI), nga nagpakita sa lebel sa inflation ug kausaban sa cost of living sa mga pamilyang Pilipino.
Gipakita sa PSA nga ang husto ug tukmang datos sa presyo mahinungdanon sa pagmonitor sa ekonomiya, ilabi na sa pag-ila sa inflation trends ug paghatag og basehan sa mga polisiya sama sa wage adjustment ug economic planning.(IKEN B. GULLEM)
Source: PSA Zamboanga del Norte