Narespondehan sa Bureau of Fire Protection (BFP)-Piñan ang usa ka lalaki human masangkot sa usa ka vehicular accident sa Barangay San Nicolas, Dapitan City, Zamboanga del Norte niadtong Mayo 14.
Sa report sa BFP-Piñan nga gipangulohan ni Acting Municipal Fire Marshal SFO3 Elmar M. Pagente, dali nga mitubag ang Shift A Emergency Medical Services (EMS) nga mga personahe sa maong insidente aron masiguro ang lugar ug mahatagan dayon og medikal nga tabang ang pasyente.
Pag-abot sa responders, nakit-an ang pasyente nga conscious ug naglingkod sa daplin sa dalan. Gipaubos dayon kini sa stretcher samtang gihimo ang paspas nga trauma assessment. Nasuta sa EMS personnel nga adunay samad ang pasyente sa tuo nga bahin sa agtang ug posible usab nga nakainom kini og makahubog nga ilimnon atol sa insidente.
Gihatagan dayon og first aid treatment ang samad pinaagi sa paglimpyo niini ug pagbutang og povidone-iodine o Betadine aron malikayan ang impeksyon ug gidala sa Piñan District Hospital alang sa dugang pag-atiman.(IKEN B. GULLEM)
Source: BFP R9 Piñan Fire Station