Gihiusa ang mga lokal nga opisyal ug law enforcement agencies sa Zamboanga del Norte sa usa ka pagbansay nga nagtumong sa pagpakusog sa implementasyon sa Barangay Drug Clearing Program (BDCP) isip kabahin sa kampanya batok sa illegal nga droga.
Gipahigayon kaniadtong Mayo 11 ang Provincial Training of Trainers (TOT) sa Top Plaza Pensionne diin gitambongan kini sa mga representante gikan sa nagkadaiyang lungsod sa ikaduha ug ikatulong distrito sa probinsya.
Lakip sa mga partisipante ang mga miyembro sa Sangguniang Bayan, Philippine National Police personnel, ADAC focal persons ug mga opisyal sa Department of the Interior and Local Government (DILG).
Tumong sa maong pagbansay nga mapalig-on ang koordinasyon sa lokal nga mga implementers aron mas mapadali ang pagpatuman sa mga programa nga nagpunting sa pagpugong sa paglapad sa illegal nga droga sa mga barangay.
Gipasiugda usab atol sa training ang importansya sa kolaborasyon sa lokal nga gobyerno, kapulisan, ug komunidad aron mahimong malungtaron ang anti-drug campaign ug mas mapanalipdan ang mga residente gikan sa epekto sa illegal nga droga.
Mipadayag usab og suporta ang mga opisyales gikan sa Provincial Government, PDEA, DILG ug Zamboanga del Norte Police Provincial Office alang sa padayong pagpalig-on sa mga programa nga nagtinguha og mas luwas ug drug-free nga mga komunidad sa probinsya.(IKEN B. GULLEM)
Source: Zamboanga del Norte Provincial News Network