Nadugangan og kahibalo sa teknolohiya ang 12 ka kababayen-an gikan sa Barangay Miputak, Dipolog City human makatapos sa Basic Digital Literacy Training nga gipahigayon sa Zamboanga del Norte Digital Transformation Center (DTC) sa DICT Compound sa Biasong.
Ang one-day training nagtutok sa mga batakang digital skills nga makatabang sa mga partisipante sa paggamit sa kompyuter ug internet isip kabahin sa modernong komunikasyon ug adlaw-adlaw nga transaksyon.
Gipaila sa mga participante ang husto nga paggamit sa computers, navigation sa Windows operating system, cyber hygiene, internet netiquette, ug basic spreadsheets aron mapalambo ang ilang digital awareness ug kahibalo.
Kini nga kalihokan kabahin sa padayong kolaborasyon tali sa Dipolog City Social Welfare Development Office ug Barangay LGU sa Miputak sa paghatag og digital empowerment programs alang sa women sector sa syudad.
Matud pa, tumong sa programa nga matabangan ang mga kababayen-an nga mahimong mas andam sa paggamit sa digital technology ug mas maabtik sa mga oportunidad nga nagkinahanglan og basic digital knowledge.(IKEN B. GULLEM)
Source: DICT IX BASULTA