Padayon ang suporta sa mga mag-uuma sa Barangay Situbo, Tampilisan human gihimo sa Zamboanga del Norte 2nd Provincial Mobile Force Company (ZNPMFC) R-PSB Team ang follow-up corn planting activity sa Purok Quirino niadtong Mayo 11, 2026.
Ang maong kalihokan kabahin sa sunod nga hugna sa suporta human sa naunang paghatag og corn planting materials ngadto sa Cympil Situbo Alsa Farmers Association, nga nagtumong nga mapadayon ug mapalambo ang produksyon sa mais sa lugar.
Gipangulohan ang aktibidad ubos sa pagdumala ni PLTCOL Edwin D. Verzon, Force Commander, isip kabahin sa kampanya nga dili lang mohatag og ayuda kondili mosiguro nga magamit kini sa tinuod nga panginabuhian sa mga benepisyaryo.
Tumong sa planting activity nga mapalig-on ang food security sa komunidad ug mapadaghan ang kita sa mga mag-uuma pinaagi sa aktuwal nga pagtanom ug pag-atiman sa mais isip alternatibong tinubdan sa panginabuhian.(IKEN B. GULLEM)
Source: Zamboanga del Norte 2nd PMFC