Gipahigayon sa Bureau of Fire Protection (BFP) Dipolog ang ilang tradisyunal nga Flag-Raising Ceremony ug Monthly Rank Inspection niadtong Lunes, Septiyembre 1, 2025, ubos sa pagpanguna sa Acting City Fire Marshal nga si FCINSP Rommel S. Carpio.
Ang maong seremonya, nga gihimo sa compound sa estasyon, gisugdan aron pormal nga pagdawat sa bag-ong bulan ug aron palig-onon ang disiplina, pagkahiusa, ug dedikasyon sa pag-alagad publiko sa tanang personahe sa BFP.
Lakip sa kalihukan ang Troop Information and Education segment diin si FO2 Raymond Jay V. Eyao naghatag og mapadasig nga mensahe kabahin sa importansya sa oras sa serbisyo sa BFP. Gipahinumdoman niini ang tanan nga personahe bahin sa husto nga pagdumala sa oras, pagka-dali sa pagresponde, ug pagpangandam isip yawe nga elemento sa epektibong serbisyo.
Human sa Flag-Raising Ceremony, gipahigayon usab ang Monthly Rank Inspection isip kabahin sa labing maayong praktis sa estasyon. Kini naglatid sa pagbantay nga tanang personahe mosunod sa saktong pamatasan, hustong pagpanamit, ug kaangayan sa uniporme subay sa pamantayan sa BFP.
Ang Dipolog City Fire Station, nga napasidunggan pag-usab isip Best City Fire Station sa rehiyon, nagpabilin nga modelo sa disiplina ug kalidad nga serbisyo publiko pinaagi sa maong kalihukan.(Jumalisa Papa)
Source: BFP REGION 9 DIPOLOG CITY FIRE STATION