Mi-courtesy visit sa buhatan ni Mayor Roberto Y. Uy ang delegasyon sa National Commission of Senior Citizens (NCSC) Region IX, nga gipangulohan ni Regional Director Dr. Fernando D. Sumondong, niadtong Lunes sa hapon, Setyembre 1, 2025, ning syudad sa Dipolog.
Kauban usab sa grupo si Mr. Ralph C. Alquizola, Project Development Officer III sa NCSC, uban sa mga lokal nga opisyales nga naglakip sa Office of the Senior Citizen Affairs (OSCA) Head nga si Mr. Sancen D. Caroro, ug ang Presidente sa Federation of Senior Citizens Associations of Dipolog City (FSCADI) nga si Mr. Noli Eyao, lakip na ang ubang miyembro sa pederasyon.
Ang maong pagbisita naghatag og higayon aron hisgutan ang mga inisyatibo ug programa alang sa kaayohan sa mga senior citizen, ilabi na sa aspeto sa kahimsog, benepisyo, ug partisipasyon sa komunidad. Gipasabot usab nga gipalig-on niini ang pakigtambayayong tali sa NCSC ug lokal nga kagamhanan sa Dipolog aron mas mapalambo ang serbisyo ug proteksyon alang sa mga tigulang.
Gipadayag sa grupo nga sa tabang ug suporta sa lokal nga pangagamhanan, padayon nga matutukan ang mga panginahanglanon sa mga senior citizen ug mapaabot ang mas episyenteng serbisyo sa barangay level. Ang City Information Office (CIO) nagpakita sa suporta pinaagi sa paghatag og dokumentasyon sa maong kalihukan.(Jumalisa Papa)
Source: Dipolog City Government