Naglatid ug plano ang Tactical Operations Group 9 (TOG 9) sa pagpatukod ug Tactical Advance Command Post (TACP) sa Dipolog City atol sa courtesy call nila kang Gobernador Darel Dexter T. Uy sa Kapitolyo Probinsyal sa Barangay Estaka, kaniadtong Disyembre 18.
Gipangunahan ni COL Sharon Louie C. Montallana, Group Commander sa TOG 9, ang pagbisita kauban si CPT Leonardo G. Visaya Jr., Acting Deputy Group Commander; SSG Angelito B. Acusa, PAF, CMO NCOIC; ug SGT Neil Vincent P. Gumahad, aide sa gobernador.
Tumong sa gihisgutan nga TACP ang pagpalig-on sa koordinasyon, mas paspas nga responder capability, ug mas epektibong seguridad sa probinsya sa Zamboanga del Norte.
Gidawat ni Gobernador Uy ang maong inisyatiba ug gipasiugda ang importansya sa lig-on nga panagbinuligay tali sa provincial government ug Armed Forces of the Philippines aron masiguro ang kaluwasan sa katawhan ug mapadayon ang kalinaw ug kahusay sa tibuok probinsya.
Matod pa sa gobernador, ang maong kolaborasyon makatabang sa mas organisado ug tin-aw nga pagdumala sa mga security operation, ilabina sa mga lugar nga nagkinahanglan ug dugang nga presensya sa kapulisan ug militar.(IKEN B. GULLEM)
Source: Zamboanga del Norte Provincial News Network